TUTURAN NGAL IRAK

Jati suang ni suda arao karangow tuturan Aladin ya lampung ajaip ao. Lampung ajaip ao kalap manulung Aladin ntuk magitak uno gala. Nyugut sarita Aladin jadi sanang pasal nakalap lampung ajaip eno. 

Ti sarita lain. Ain sarita Aladin tapi kan-kan samo ni katab tuturan ao.

Arao sanginan manyanai nakarumpak butul batutup apung-apung nalulun  mok aig  bawang. Enalap ao butul eno. Banuka ao tudung panutup butul.

POP! katab ao.   Sanilaw lisun purak tad senalom butul eno. Andi buai tad eno lisun eno pun batukar njadi jin.

"Tarimo kasi. Tarimo kasi," kain jin eno nayak gena. "Tarimo kasi karna ngalapas kuji tad senalom butul eno. Karna ekow suda nulung kuji jadi kuji mau nulung dijun uno gala gatakon mu. Talu gala pakara yao malap ekow gitak," janji jin eno li mok mayanai ti kuma.

Uno lagi manyanai ti pun nayak gena. Mulo-mulo ao eyo nalakak nakakito jin eno. Salalu ao jin-jin ti merat. Salalu andi mancoi parangai ero. Tapi jin yo tunggal ti lain. Jin ti mau manulung diso. Malumla karna eyo nanulung diso sanilaw tad senalom luang butul eno. Tah mana buai ta jin eno nabaong dino. Uno pasal diso suat abaong andi la jati kalap pandai.

"Ah uno gatakon ku,"  pikir manyanai ti kuma senalom gena. Suma talu gala pakara yao malap getakon ao.

Manyanai ti jalama miskin jadi tapikir senalom gena ao mau jadi kayao macam jalama suang.

" Ah mantiti, " kain ao ngara di jin. " Partama kuji mau gitak usin suang miso bilion senalom bank gayao pagun Switzerland, " ara ao.

"POP!"   Nikot sakaping buku akaun bank mok langaon ao. Senalom ao arao catitan ngaran diso ya usin miso bilion Swiss Franc. Wah nayak banaor gena ao. Mancoi jin ti. Lurus janji ao ainka bagabow.Kuji kayo ti, kain ao senalom gena.

"Yo kaduwo, kuji mau gitak bantuka  jenis Sports Ferari," kain ao.

"POP!" Ampai-ampai sabua bantuka Ferari disan alun-alun mok bukid andi sadu tad bawang ti kuma. Wow! Makin tamba nayak gena ao. Nintong ao bantuka ao eno. Arao kunci. Sengaye ao arao. Eyo memang pandai mampanaw bantuka. Suda arao lisin.  Nastat ao bantuka Ferari ao eno. Mancoi katab injin ao. Ainka bantuka "second-hand" pikir ao sandiri-sandiri.

"Uno lagi gatakon ku yao pangabisan," pikir ao lagi. Usin suda arao. Bantuka lawa suda ni arao.

Tapikir eyo pasal kakimu. Manyanai ti kuma kakal bujang. Bujang talajak la no. Malumla anjop arao usin. Dambao arao kimu mau manganao di diso.

"Iti getakon ku yo katalu, yo pangabisan," kain ao ngara di jin.

Jin andi ngkatab uno-uno. Ngintai sabit tuntut manyanai eno gala.

"Kuji gitak..... hm hm ... mau samacam barang yo di suka gama kakimu-kakimu lawa , " ara ao. Eyo mau sengaye kakimu suka makakito di diso.

"POP!" katab ao. Manyanai ti pun najadi  sa kotak bungkus coklet.

Kan suang kakimu suka makan coklet yo mamis-mamis. Pikir jin ti memang manyanai ti mau jadi coklet ainka lawa mangagud digena kakimu (attractive to women)

Nah... naye sarita ao antob eno  gala.

Ingat-ingat jati la kalaw kakalap kauntungan sa macam eno. Adaong sala getak. Uno guno ao kalaw suma njadi coklet. Kasian manyanai eno.


Ti suma tuturan ngal irak gala. Medan-medan jati kalap katamu lagi ya sarita lain la.

KISA MARUGI BUNGKUK

Ti arao tunggal tuturan laid pasal sabatang kayu marugi.  Banaor andi andi la kuji kalap pandai pasal jalama tatuwo tagulu salalu ngal tuturan macam-macam. Arao sarita pasal anak datao, arao pasal lamatai, arao pasal banatang. Masing-masing nao arao tujuan ao sandiri. Paling suang tujuan ero tagulu batutur khas untuk mangada masa pabila waktu bajaga nyaban-nyaban samasa majlis ramai-ramai atau pun samasa manamaong apui salaong jalama matai.


Sarita ti jenis sarita usul asal karana eyo arao kaitan ao ya ngaran sabua kampung mok Mukim Bukit Sawat ti.

Mantiti tuturan ao.

Masa tagulu arao sabatang kayu gayao jenis marugi samuni disan tambing bawang gayao Bang Pali (Sungai Belait) bidan dud alung bawang Singgob (Sungai Singap). Kayu eno sundung-sundung li mok bawang tuju ao. Sariba ao no bawang gayao, aig ao santiasa labow ayu ao. Senalom aig nao salalu arao bayao. Bayao nao suang gayao-gayao maalumla masa eno anjaop lagi arao jalama tukang ngalir mangalap bayao-bayao seno. Ngal kakalak ni. Pasal bayao-bayao nao salalu garang-garang. Kalaw arao banatang saperti asu atau kara samadui tantu agaon ero nyimpad talanon kanaon ero iyaw-iyaw.

Nikot nao sanginan lanut bandalon gayao ngipa bayao samadui sariba batang marugi eno. Nalilit ao inan ao ya ikiw ao kuat-kuat mok tanga batang marugi eno ngintai ngipa talib sadui bayao mok bawang eno.

Intai punya intai anjaop ni arao anak-anak bayao siow samadui sariba diso eno. Lakak kakito lanut gayao mok batang marugi eno. Samana-mana nikot sanginan bayao gayao tad saba samadui samulok li dud tamalib sariba diso eno. Uno lagi  lanut ti andi ngada paluang tarus panatuk ganagaol tarus enunduduk ao bayao eno li tambing. Bayao eno pun bakuat kan ngalapas inan eso. Mayi antaob kuat la eno. Sagunduk duo sangadaw-ngadaw. Bayao nakalap ngagaol inan lanut eno. Tarus ganagaol ao andi lapas-lapas. Lanut bandalon eno pun andi mau ngalapas kabang ao tad inan bayao eno.

Duo talu adaw duwo bagagaol basagunduk andi lapas-lapas. Duo-duo duwo nantagu pasal bagagaol patai-patai. Kuat gena lanut eno kan ngunduk bayao eno sabaoi nabungkuk batang marugi alan ao balilit eno. Akher-akher ao duo-duo duwo natai nalama. 

Pasal eno la jalama tagulu enggalar kawasan kaliling tampat  lanut ya bayao gagaol basagunduk eno Kampong Marugi Bungkok tad tuturan uno pasal marugi mok disan tambing kibang samulok li dud eno nabungkuk. 


[Pikir-pikir arao ni andi pa lojik karana sapatut ao batang marugi eno naba masakat gala pabila lanut ya bayao eno bagaol basagunduk ainka batang ao nabungkuk. Tapi ti tuturan laid. Tuturan jalama tatuwo. Adaong jati pandai-pandai nguba isi sarita ao.  Kalaw nasakat uno jadi sarita ao -  kan baruba ngaran kampung eno njadi Kampong Marugi Naba ain lagi Marugi Bungkok! Maaf. Kan hal ao gala. PENULIS]