Bukit Serawong sabanaor ao arao ngaran asal ao. Ngaran asal ao yao nao KID SARAUNG.
Kid bamaksut bukid, saraung [sa-ra-ung] ti yao nao kuo yao isu jati ngadundung ulu samasa jati ngatu parai. Arao saraung enataw ngisu raun ukang, arao ni jenis saraung jenis bulu. Uno pun saraung ti memang isu jati ngadundung ulu sapaya andi suat lasu adaw ataw pun masa gama aig rasam. Saraung ti bulat, salalu ao andi pa gayao. Paling gayao kiro-kiro 60 cm gala kalaw agaon nyukat rampaod li rampaod. Kalaw angat gayao magat ni jati nyuloab mok ulu jati.
 |
| Saraung ukang |
Kid Saraung ti arao kaitan ao ya tuturan laid tantang banjir gayao. Ainkan labur tapi kisa banjir gayao mok dunya ti samasa tagulu. Sarita labur eno lain lagi. Andi samao yang sarita banjir gayao. Ti kisa banjir gayao. Masa jaman tagulu, kisa ao, tah bagaimana ka mulo ao, rasam ti adaw-adaw mendauu, andi pandai ranti-ranti. Malumla sengaye ti senalaom kuasa Alatala. Jati manusia ti memang andi buli pandai sengaye yao buli tajadi mok dunya jati ti. Alatala gala yao pandai.
Karna rasam ti andi pandai baranti uno lagi sengaye kawasan nasakob gama aig kasuali bukid-bukid yao sawat. Ngisu sarita, kawasan Bukid Seraung ti pun nasakob kaliling ao. Yao tinggol suma ao puruk bukid ti kuma. Eno pun andi pa gayao tinggol ao. Arao gayao balad saraung gala yao andi nasakob. Eno la pasal ao ganalar gama jalama tagulu kawasan ti kuma sabagai Bukid Saraung, yao entiti sanatit ngaran ao senalaom tuntut Melayu sabagai Bukit Serawong. Bukid ti samuon senalaom kawasan Mukim Bukit Sawat andi pa sadu tad Sekolah Rendah Merangking. Memang puruk ao masawat kalaw agaon manding ya puruk bukid yao lain disan ao misal ao Pak Babau, Magilang ataw Danggi.
[Masati arao suda rancangan gama sabua sarikat swasta untuk manidaong manara pamancar alat parubungan mok sawat bukid ti kuma sapaya jalama garaom mok kawasan kibang kanan ao ti la sanang batalipun ngisu talipun mobile. ]
