Kaladi ti memang suang arao jati kakito masati. Kaladi ti suang banca. Arao kaladi payao, arao kaladi silung, arao kaladi intan ya lain-lain ao lagi. Suang la nao banca kaladi tananaom jalama dambao-dambao gala masa ti.Tuturan ao masa gulu jalama jati ti andi pandai makan anci kaladi. Maalumla kalaw anjop parna karasao memang jati andi siow makan uno-uno gala kasuali kalaw arao jalama lain ngara di jati barang eno malap ekanon. La kalaw sala-sala akan lain gat jadi ao. Malangu karasunan la jadi ao. Masa gulu anjop lagi arao alan sipitar. Anjop lagi arao duktur ataw darisa. Kalaw sala akan lain gat jadi ao. Maalumlah jaman gulu-gulu laid.
Sarita ao salain mangisu bagang tana giloat jalama tagulu ngisu anci kaladi ti yalan ero sabagai andaon untuk ngadampal pariuk sawat apui. Biasa ao jalama ngisu talu bagang andaon untuk nyungkad uno-uno gala. Ero ngisu anci kaladi payao karana kaladi payao ti bulat ya gayao sasuai untuk yalan ero jadi andaon sungkadan.
Mana-mana sangadaw eno kakimu yao namaong sungkadan ao mok sawat apui eno nakadaop makuku disan rapuan. Antah andi sadar-sadar eyo natumbang li mok rapuan tarus epon ao kagagaol andaon kaladi ti kuma. Eyo pun kasadar nakaliman. "Eh mancoi rasao andaon ti," kain ao senalaom gena.Ganagaol ao lagi bagang andaon eno. Kaninyam ao banaor mancoi rasao ao.
"Ei mancoi rasao anci kaladi ti," kain ao ngara jalama lain mok alai eno. Uno lagi, jalama yao arao dino pun ngancuba nginyam rasao bagang kaladi kuwo nengal ero bagang andaon eno.
"Bujuk rasao ao," kain ero suang-suang.
Naye anci kaladi kuwo nengal ero andaon eno enakan ero.
Memang la anci kaladi ti kuma nancak gama lasu suat padar apui yao jalab-jalab eno. Kaladi bapadar mok apui ti rasao ao karing tapi nyaman bujuk-bujuk ekanon.
Tad eno la kisa ao mulo-mulo jalama jati ti pandai makan anci kaladi. Andi neo yada ero gala-gala balaku bagang tana. Sanuba ero makan kaladi-kaladi yao lain. Mancoi ni rasao ao. Pasal eno la baru jalama jati ti pun pandai mananaom kaladi mok disan-disan alai ero saboi li jaman jati ti.
Tapi ingat-ingat ni kalaw makan kaladi ti. Silap-silap adaong makakan kaladi jenis yao gilat.
[Nyugut sarita jalama tatuwo, kaladi buli jadi gilat kalaw eo suat jalag panaw lanut ataupun kalaw kaladi eno suat endakaw jalama lain. Banaor andi, andi la kuji pa pandai. PENULIS]
---------------------------------------------
Ti arao pantun SJD bakaitan ya kaladi:
1. Nau sada selalom lanji
Adaong kalamuan anci kaladi
Kalaw suda jati bajanji
Adaong dila andi jadi
2. Anci kaladi lapaon bubur
Bubur sanapak santan pasaw
Adaong jati angat takabur
Mandow madaop adaong ngacaw
-----------------------------------------------
