Andi Buli Manang

Kan mau manang sangaye?

Tantu sakali. Ino naluri biasa manusia.

Anjop aro jalama yao mau ala suma-suma.  Ala rati ao ngal ikum. Mikom entangan jalama suang.  Makak jadi peradan. Jadi bua tuturan jalama sino siti.   

Tapi...... yao gi TAPI....

Jati sabanaor ao andi buli manang. Selalaom keadaan jati manang yao sabanaor ao jati nao suda ala. Suma jati andi kito. Jati andi sadar...... ataupun JATI ANDI MAU SADAR!!



Mantiti.

Suba jati naliti suntu-suntu yao sariba iti:

Waktu badagang jati bagutoal maya jalama mali, walaupun jati manang tapi palanggan jati tatap midu.

Kalau bagutoal maya kawan miso jati bakarijan, walaupun jati manang tapi gaira samangat bakarijan miso kumpulan kan malanjop.

Kalau bagutoal maya bos atau majikan walau manang tapi arapan mancoi masa dapan mok tampat ino kan malanjop.

Kalau bagutoal maya indu yama, maya rumo santari, walaupun manang tapi ubungan bakaluarga tantu jadi ranggang.

Kalau bagutoal maya guru, walaupun manang tapi barakat ngalap nuntut limu maya kemesraan pargaulan tantu kan lanjop.

Kalau bagutoal maya kawan, walaupun jati manang tapi yao pasti jati kan kurang neyo kawan.

Kalau bagutoal maya anao, maya sawo, walaupun jati manang tapi
parasaan sayang pasti kan bakurang

Kalau bagutoal maya esoi-esoi pun, walaupun jati manang tapi
jati tatap ala.....

Yao manang.... suma EGO inan sandiri. Perasaan mamenting hal inan sandiri gala.


Memang susa untuk mangala ego jati sandiri.  Tapi suba gaon ngujum selalaom gena. Ego nao adaong la angat labi-labi. Anjop aro untung ao. Suma rugi yao aro.


Suba jati samao-samao bapikir....

Pabila jati narimo taguran tad esoi gala maka adaong la tarus-tarus  makasiow ataupun batuntut rauk-rauk macam jalama kasuat rasuk tapi basyukur la karana rupa-rupa ao kakal arao ni jalama yao mau nagur kasilapan jati. Basyukur la jati.  Suang-suang basyukur.

Asil ao eyaw jati kan sanang  ..........
        - suang palanggan, tantu untung
        - suang kawan, tantu suang buli nulung
        - lingkas nakod pangkat, tantu suang kalap usin
        - kaluarga aman damai, tantu eyaw harmoni
        ......... macam-macam lagi